Memorable conversations

Student: Teacher ball dedo

Me: Nae, kho gai tou?

Student: Teacher dedo, nae khoe gi

Me: Nae

Again, another day:

Student: Teacher ball dedo

Me: Nae aj main nae lai

Student: Main tou laya hun (takes out his own tennis ball)

Me: Arey wah! Mujhe dedena main class mein use kerlungi

Student: Nae, kho gai tou?

-*-*-*-*-

Student: Teacher aj ap ne second mein class nae li?

Me: Han wo kuch charts bananay the

Student: Ohh, tou teacher AP ne apna homework nae kiya tha!

-*-*-*-*-

One of the fellows (during scrabble): Ek letter ki kami thi warna aisa score banta mere word ka!

Student: Mujhe batao konsa letter main dunga lekin tum score mujhe dena phir

-*-*-*-*-

Me: Summer school ke baad kya keroge?

Student (as he colored in the TFP logo I drew for him): Roenge aur kya?

Me: Kyun bhae? Pichle saal kya hua tha summer school k baad?

Student: Teacher tab tou aisa roey the!

Me: Tab tou tum log 7^th mein the. Itne baray ho ke roey the?

Student: Tab bhi hum bachay the, ab bhi hum bachay hain.

-*-*-*-*-

Me(while teaching nervous system): Agar apki naak pe makhi a ker bethe aur ap usay hath se uraein tou apke jism mein peghamat kese ek jaga se dusri jaga jaenge, kin azaa ke zariye?

Student: Miss, ye bhi tou hosakta hai ke makhi naak pe bethi ho tou dimagh hamari zabaan ko hukm de aur phir zabaan nikal ker makhi pakar le?

-*-*-*-*-

Me(while teaching root systems in my best possible dramatic voice): Karachi mein tez andhi ai, billboards gir gaey, gaariyan ulat gaein lekin darakht kharey rahey. America mein toofan aya, bahir phelay kapre ur gaey, busein ulat gaein lekin darakht kharey rahey. India mein monsoon ki baarishein aur hawaein chalein. Sab ur gaya, lekin darakht kharey rahay. Kya horaha hai teeno soorat-e-haal mein?

Students: darakht kharey rahay

Me: Darakht kyun kharey rahey?

Students: Kyunke jarein mazboot hoti hain aur zameen ko jakar ke rakhti hain.

[Just then a tree topples over outside my classroom window.]

Students: Teacher, darakht tou gir gya!

-*-*-*-*-

Student: Teacher ap humein parhanay ao na? Humse milne aya keroge na? Humein kahin ghumane le jao na?

Me: Han hum soch tou rahay the kahin tum sab ko le janay ka magar sambhalna mushkil hojaega shayad.

Student: Koi baat nae teacher, Roshan hai na. Us ki ek awaz pe sab bhagte ajaein ge.

Me: Sir Ali se baat kerenge hum.

Student: Teacher pichlay saal humein cantt station le gey the, kya jaga thi! Wahan dispenser laga hua tha tou mene glass mein adha bhar liya tha. Main tou peenay jar aha tha lekin phir dekha ek admi aya, yun hath mein mala aur hath dho ke chala gaya. Kisi ne phir bataya wo shampoo tha jis se hath dhotay hain. Teacher main tou peenay wala tha!

-*-*-*-*-

Student (making the victory sign): Teacher ye kya hota hai?

Me: Ye V victory ke liye hota hai. Jese ap jab kuch jeettay hain tou yun kertay hain.

Student: Achaa. Wo tasweer khenchte waqt sab yun ker rahay the, mujhay samajh nae aya. Ap ne bhi kiya hua tha tou mene bhi kerdia.

-*-*-*-*-